الأربعاء، 30 سبتمبر، 2009

صفا الروح


دنيا عامله زي البحر
قلابة بتلعب بينا
شويه فوق وشويه تحت
ولا علي حال بتخلينا
ساعه تفرحنا وساعه تبكينا
ومش عارفين بكره ايه هيجري لينا
تشقينا لجل ما تفرحنا
وتفرحنا لجل ما تشقينا
واه من طعم الفرحه بعد الشقا
ويا سلام لما تحس الروح بالصفا
دا كل شئ في الدنيا بيعدي
الحزن بيعدي والفرح بيعدي
دا كل شئ في الدنيا محسوب
والنصيب غلاب وعلينا مكتوب
دا كل شئ في الدنيا بأوان
وهو ده طبع الحياة والزمان

الثلاثاء، 29 سبتمبر، 2009

سبحانك يا مغير الحال


وصحيت يا حلم من تاني
وخلاص هتروقلي يا زماني
وهاخد في الفرح مكاني
وهتربع علي عرش احلامي
وبعد عذاب سنين فاتت
هتاخدني الاحاسيس الحلوه والاماني
لحلم تاني
حلم زود النشوة في قلوينا
ونور الطريق قدامنا
ونسانا احزانا وهمومنا
وحلي مرار ايامنا
وخرجنا من جروحنا واوهامنا
والمولي قادر غير احوالنا
لانه عالم بصدق قلوبنا
ومشاعرنا واحاسيسنا
واللي راح زمان ربنا بيعوضهولنا


سبحانك يارب الحكمه

بحلم


ليه كل الناس بتتكلم على كل الناس, ليه عايشه حياتها بتتسلا بكلام وخلاص

حتى إنا أوقات بتاخدنى حالات واهمس بحاجات ولا ليها أساس وكلام وخلاص

وازاى من غير إحساس وضمير هنلاقى طريق ومنين ومنين

وقلوب الناس اغراب هنلاقى صديق لا هقول من تانى كلام ولا حهمس تانى خلاص

دة العمر يادوب ايام اة من جرح الإحساس

لية كل الناس بتتكلم على كل الناس لية عايشة حياتها بتتسلا بكلام وخلاص

حتى انا اوقات بتاخدنى حالات واهمس بحاجات ولا ليها اساس وكلام وخلاص

بحلم .. بحلم لو يوم الناس بقلوبها تحب الناس

وأتمنى .. وأتمنى نعيش وتكون كلمتنا من الاحساس

ونعيش والحب يدوم وندوب كلنا اخلاص ولا نجرح بعض فى يوم وقلوبنا تكون للناس

لية كل الناس بتتكلم على كل الناس ليه عايشة حياتها بتتسلا بكلام وخلاص

حتى انا اوقات بتاخدنى حالات واهمس بحاجات ولا ليها اساس وكلام وخلا ص

لية كل الناس بتتكلم على كل الناس
اصاله

في الانتظار


ياللي اشترتونا بالغالي
مقامكم جوانا كبير وعالي
ونتمني نتهني معاكم
طول الايام و الليالي
ياللي قدرتونا وعززتونا
وللحزن والالم نسيتونا
في انتظاركم
لجل ما تفرحوا وتفرحونا
ومن المحبة والخير تسقونا
وبالطيبه والحنان تعيشونا
شارينكم زي ما اشتريتونا
وبنقولكم احنا في انتظاركم
وربنا يحميكم ويصلح حالكم
وربنا يجعل ايامنا الجايه احلي
واحنا في انتظارها

الخميس، 24 سبتمبر، 2009

خليك برئ


خليك برئ
طول الطريق
وعدي الليل الغميق
وانت للحب والخير صديق
وبلاش تحتار
واعرف ان ليك رب كبير
هو اللي بيقسم وبيختار
خليك معاه طول المشوار
واللي يحبك حبه
وخاف عليه وراعيه
واللي ينساك سيبه
ومتشغلش بالك بيه
دا البايع هو الخسران
ضيعك من بين ايديه
واوعاك تذل لحد نفسك
ولايوم ترخص نفسك
وعيش وريح بالك ونفسك
بالحب والخير رضا
هتنول كل اللي في نفسك
وخليها علي الله

السبت، 19 سبتمبر، 2009

كلام ع الماشي



عارفين
عارفين اي اجمل حاجه في الدنيا كلها الدفا والامان انك
تحس انك عايش وسط ناس طيبيين مليانين احساس ومشاعر
نقيه طاهره ميعرفوش الغش والغرور والخداع ,ناس
متواضعه والاجمل لما تبتدي كمان حياتك تبدأها مع حد يحبك
حقيقي ويخاف عليك بجد. حد عمره ما يذلك ولا يجرحك وتبتدوا
حياتكم مع بعض علي الاساس ده الاساس اللي عمره ما يتهد
دا اذا كان فعلا حب حقيقي مبني علي الاحترام والأخلاص .
بس هي فين الناس دي اللي بتعرف تحب وتدي بأخلاص
فين الناس اللي بتعرف تحب غيرها عن نفسها, ياتري فيه ولو قلة قليله
اكيد طبعا فيه وربنا هو اللي بيجمع الناس الطيبه مع بعضها ,
هو وحده اللي بيبقي عالم بنوايا الناس وخبايهم وبيديهم علي قد
نييتهم ,في الدنيا بنقابل الوحش والحلو
الوحش عشان ربنا يخلينا نشوف حاجات نتعلم منها ويختبرنا
والحلو عشان يعوضنا عن الوحش .
وربنا يهدي الجميع

samar



انا فرحانه قوي النهارده ومبسوطه
لقيت نفسي بجري علي المدونه وعاوزه اكتب واقول
لاغلي انسانه في حياتي كلها
كل سنة وانتي طيبه بمناسبة عيد ميلادك ويارب يجعلها سنه سعيده عليكي
وكمان بقلك الف مبروك بمناسبة خطوبتك وبقلك ربنا يسعدك
ويوفقك ويبارك فيكي انتي وخطيبك وينور حياتكم
مبروك يا سمر ويارب نفضل دايما مع بعض واصحاب طول العمر

الأربعاء، 16 سبتمبر، 2009

مسألة مبدأ





كل الجروح ليها دوى

يا طير يا حالم ف الهوى

اطوى الجناح على الجراح

واضحك ويلا نطير سوى

انا مش هبيع الصدق بالاكاذيب

ولا ااقولش للحمل الوديع يا ديب

ولا ااقولش للديب يا اعز حبيب

والصدق مهما عزّ

ف الازمة مش ههتزّ

ساعات يكون كتم الانين

أصدق

وانا مهما ااقع راح أقوم

ودي مسالة مبدأ

كل الجروح ليها دوى

يا طيريا حالم ف الهوي

اطوي الجناح على الجراح

واضحك ويلا نطير سوى

بيكدبوا الصدق اما

الكدب يتصدق

يا ليل

ياليل تطول بكره

تلقي الفجربيشقشق

انا في انتظار الصباح

انا احتوييت الجراح

وخلااااااااااااااااص

نسيت الي راح

ومن جديد هبدأ

ودي

مسألة مبدأ


علي الحجار

الأربعاء، 9 سبتمبر، 2009

لا شئ غير الله


اصعب شئ لما يكون انسان عزيز علي قلبك وفي يوم
تلاقي مشاعرك اتجمدت من ناحيته ,بعد ما كنت دايما بتتكلم
عنه بقيت مش عاوز تسمع اي حاجه عنه ولا طايق تشوفه قدامك
بعد ما كنت بتحترمه وشايف بصورة فجأة الصورة كلها بتتغير
يا تري!!!!!!!!!!!!!!
المحبه فعلا ممكن تحول لكره؟؟؟
في قلوب مهما داقت معني الظلم عمرها مبتعرف تقسي ولا تجرح ابدا
لانها قلوب صادقة مع نفسها قلوب مؤمنه بربنا, واثقه انه
هيعوضهم الافضل . قلوب بتحب بأخلاص وفجأه تلاقيهم وقعوا في حفرة
مش عارفين يطلعوا منها وكأنهم غرقوا خلاص لكن القرب من ربنا
بينور القلب و البصيره تبص تلاقي نفسك بعد ما كنت غرقان بقيت انسان تاني اقوي
القوه مش معناها اني اظلم وافتري علي ناس تانيه زي ما اتظلمت لا...
القوه معناها اني اتحمل واصبر اني اقدرت اتغلب علي الوجع والحزن
اني عمري ما هتعلم الغش والكبر والانانيه والظلم اللي شربت منه مش هدوقوا لغيري.
بقول لكل انسان طيب مخلص قاسي من تجربه مره اصبر وعيش دايما بالامل وارضي
بنصيبك وافرح لانك طول ما انت راضي ربك واهلك هيجيلك الخير وهيجيلك اللي
يقدرك ويفهمك صح ,وهيديلك كل اللي انت اديته لناس تانيه قلبك اختارهم غلط
ووقتها هيكون محبتك ليه اقوي لانك محتاج للمحبه دي
وربنا يبعد عننا اي غلط .