الجمعة، 25 نوفمبر، 2011

غريبه يا دنيا

غريبه يا دنيا
ليه بتلعبي بينا
عجيبه يا دنيا
وليه دايما بتعذبينا
مالهموم بتشيلينا
وعن الفرحه بتبعدينا
بتدي حاجه وتاخدي حاجه
انتي فعلا ولا حاجه
بتجمعينا وف لحظه بتفرقينا
وف ذكريات تعيشينا
ذكري حلوه نتمني ترجع
وذكري مره ف القلب توجع
قلوب فراقها ملانا احزان
وقلوب معدش ليها جوانا مكان
ناس مهما بعدت عايشه فينا
وناس راحت وتاهت مع الزمان
زيها زي سراب كداب
لا يستحقوا يكونوا احباب
ولا نتحمل عشانهم العذاب
مش بقلك غريبه يا دنيا

السبت، 29 أكتوبر، 2011

لقاء وفراق


الدنيا محطات ,مواقف وذكريات
بنعيش فيها حكايات تقابلنا كتير صدمات
نقابل ناس نفارق ناس ,كتير منهم خدوا مننا حب وصدق
مخدناش منهم غير جرح وعذاب
لكن الجرح دا بيعلمنا حاجات كتير للأفضل وبياخد وقته ويعدي.
ومعزتهم بتنتهي بمجرد ما تنجرح منهم قلوبنا
وناس تانيه قليلين بتظهر معادنهم وقت الشده ,يستحقوا كل الحب
خدوا مننا حب وخدنا منهم دفا وصدق واتعلمنا معاهم معاني الحب والتضحيه
هي دي الحياه ناس بتسيب ذكري حلوه تعيش ف قلوبنا طول العمر
وناس بتسيب ذكري مره كئيبه متستحقش غير النسيان

وكل كلمه حلوه هنا للناس النادره اللي حبتها بجد وحبوني من قلبهم
واللي فعلا يستحقوا كل شئ جميل

السبت، 27 أغسطس، 2011

انت فين
محتاجك جنبي وبناديك
وليه بعيد بلاقيك
دانا ياما كنت مستنيك
وف احلامي عشت بناديك
خليك هنا
معايا نبني عشنا
وتعالي نحقق حلمنا
ولا اي شئ يهمنا
وليه نخاف من بكره
بكره ملك ربنا

السبت، 13 أغسطس، 2011

اعمل ايه؟؟؟


اعمل ايه واراضيك
ولا هفضل احايل فيك
بعتذرواقول سامحني
طيب رد عليا وريحني
ولا الخصام سهل عليك
هي المحبه تبقي ايه
من غير ود وسماح
ولا هي كلمتين وخلاص
امال فين هو الاحساس
بتحمل كتير علشانك
وتعمل ايه لو كنت مكانك
تحايلني وتراضيني
ولا تقسي عليا وتبكيني
ولا هو الحزن مش بيجي
الا من اغلي الناس
اعمل ايه قولي
اعمل ايه؟؟؟؟؟؟؟؟؟؟

مالاخرالرساله دي من اي حد زعلان مع خطيبه

اجمل كلمات من زوجه لزوجها


كنت فين
انا عشت سنين بستناك
كنت فين
ياما كنت بحلم بلقاك
كنت فين
رسمت صورتك ف خيالي
واتمنيت تيجي ولو لثواني
تاخدني لعالم تاني
عالم كله حب وحنان
احس فيه براحه وأمان
وانسي بيه كل اللي كان
شفتك كتير ف منامي
وانا ماسكه ايدي في ايديك
بالفستان الابيض والطرحه
وقلبي بيرقص مالفرحه
وبدعي ربي وبتمني
اشوف الحلم حقيقه
ويجمعنا بيت يضمنا
ويكبر فيه حلمنا
يعيش فيه حبنا
طول ما احنا مع بعضنا
والحمد لله الحلم اتحقق
وبقينا خلاص لبعضنا
وبنينا بالحب عشنا
وعشت معاك ايام
احلي من كل الاحلام
يارب يخليك ليا
يا حلم عمري الجميل

الأحد، 31 يوليو، 2011

رمضان كريم


رمضان شهر العبادات لا شهر المسلسلات
اللهم بلغنا رمضاااااااااان
وكل سنه وانتوا طيبين
رمضان كريم علي الامه الاسلاميه كلها

السبت، 9 يوليو، 2011

دموع وكلمات


معدش حد بيرحم
ولا حد بقي بيقدر
كله بيجرح وبس
ولا حد بقي بيحس
الوجع معشش جوا القلوب
والدمع طالل مالعيون
ولاشئ عاد بيفرحنا
حتي الحلم بقي كابوس
والضحكه بقت شئ ميئوس
بقينا عايشين زي الاغراب
قلوبنا تايهه حواليها ضباب
والدنيا قاسيه ومفيهاش احباب
والقلب ما الحزن داب
ولأمتي هنفضل نتألم
من غير ما نصرخ ولا نتكلم
لأمتي يا دنيا لأمتي

الأربعاء، 15 يونيو، 2011

الحب


الحب مش قصه ولا حكايه
ولا لحن جميل ف غنوايه
الحب بحر حب وحنان
ملوش حدود ولا نهايه
الحب مش كلمة وخلاص
الحب شوق دفا واحساس
ومعني كبير ف قلوب الناس
الحب يعني قلب يحبك
وعيون تخاف عليك وتضمك
وروح تشتاق لك كل ثانيه
تملي عليك كل الدنيا
تتمني تشوف دايما فرحتك
ولا تقدر تشوف دمعتك
ومهما نقول اننا بنحب
محدش حاسس معني الحب

الأربعاء، 8 يونيو، 2011

مبروك يا داليا


يارب صونها واحميها
واسعد ايامها ولياليها
بالحب ارسم ضحكتها
بالفرح حقق امانيها
دي حبيبتي وغاليه عليا
يا اغلي من ضي عنيا
ربنا يخليكي ليا
يا اجمل عروسه ف الدنيا
مبرووك يا داليا

الاثنين، 23 مايو، 2011

مسير الحلم يتحقق


يا بكره يا جاي استني
انا عشت كتير بتمني
لحظة ود وحب
ادوب فيها واتهني
يادنيا غداره جرحتينا
ياما قسيتي وجيتي علينا
ابعدي عنا خلاص وسيبينا
نعيش لناف الفرح يومين
ننسي بيهم جرح السنين
نعرف طعم الشوق والحنين
ونرسم ضحكه ف عيونا
تمحي دموع القلب الحزين
سيبينا يا دنيا وانسينا
وكفايه اللي عملتيه فينا
ادينا بنعافر وهنوصل
ومسير الحلم يتحقق
وهنقوي بيه مهما تعاندينا

الأربعاء، 4 مايو، 2011

طير يا حزين


طير يا حزين وانسي
واياك ف يوم م الهم تقسي
عيش بالأمل واتهني
بالحب داوي كل الجراح
وارمي وراك كل اللي راح
دا مهما الدنيا عذبتنا
وجرحتنا كتير وغربتنا
مسيرها يوم تحلي لنا
وبكره اللي مكنش علي بالنا
جاي وهيغير أحوالنا
وهيملي قلوبنا دفا وأفراح
وطول ما احنا عايشين
عايشين نفرح ونتألم
وهي كدا الايام بتعلم
واهو كله مكتوب عالجبين
الحمد لله رب العالمين

السبت، 23 أبريل، 2011

حب وعيش


حب وعيش وانسي الهموم
دا بكره جاي يمحي الغيوم
والقلب اللي عاش محروم
والقلب اللي بات مظلوم
جرحه عمره ما بيدوم
ومهما نحزن ونتألم
ومهما الدموع تتكلم
مسيرالحال يتبدل
وتروق الدنيا وتتعدل
انسي وعيش ايامك
اخرج من دايرة اوهامك
دي الحياه لسه قدامك
مبتقفش ابدا علي شئ راح
والليل لو كان طويل
اكيد من بعده جاي الصباح

بعد غياب كبير عن المدونه
راجعه بقول لكم وحشتوووووني قوي
عيش ايامك

الثلاثاء، 5 أبريل، 2011

خبيني


خبيني ف حضنك دفيني
وف نن عيونك داريني
محتاجه حنانك يسقيني
من ظلم الدنيا يحميني
ضمني بحنان حسسني بالأمان
عوضني عن كل اللي كان
نسيني قسوة الزمن والحرمان
حلي بكره ف عنيا
خلي ايدك في ايديا
بالحب نواجه الحياه
ومهما شفنا منها ياما
هنعيش ف بعض بنتحامي
هنقوي ببعض ونتحدي الزمان
طول ما جوانا الحب والحنان

الخميس، 10 مارس، 2011

لا يا دنيا كفايه


صابر يا قلبي علي الايام
دايب وتايه ف الاحلام
خايف ف يوم تصحي
تلاقيك غرقان ف الاوهام
صابر يا قلبي يامهموم
احساسك راح وسط الغيوم
عشت ليالي محروم
من لحظة حب وحنيه
كفاياكي يا دنيا اّسيه
كفاياكي بقي تخبيط فيا
لكن لا وبقولك لا
مهما تكسريني
م الجروح مش بتعلم شويه
ومسيري هقوم من تاني
وهتحدي الحزن اللي بيا
وبقولهالك يا دنيا
بايماني بالله هتحمل
وهقوي عليكي قبل ما تقوي عليا

الثلاثاء، 8 مارس، 2011

ايام وليالي


ايام وليالي بتمر
والليل طويل وطعمه مر
وقلوبنا ف ضلامه تايهه
مابين شجن وعذاب وويل
وضاع خلاص حلم جميل
عمره ما شاف النور
عاش ومات ف قلب مكسور
عمره ما يوم اتهني
ولا عدي بره السور
مجروح يا ولداه
مهدود من قولة الاّه
عايش وماسك ف طوق نجاه
ماهو هيعمل ايه مسكين
عيني عليك يا ابو قلب حزين
لكن ارجع واقلك مهما كان
مسيرك يوم هتحس بأمان
وتدوق الدفا والحنان
بس ادعي ربك
دا هو الكريم الرحمن

الأحد، 6 مارس، 2011

برافووووووووووو


برافو عليكي يا دنيا بتتحدينا
جرحتي قلوبنا وكسرتينا
لكن كفايه انك علمتينا
اننا مندكيش يوم الامان
برافو عليكي يا دنيا وجعتينا
ومليتي الدمع ف عنينا
عرفتي ازاي تتعبينا
وتدوسي علينا وترمينا
برافو عليكي يا دنيا قلابه
غروره عجيبه وكدابه
فيكي قلوب كلها احساس
لما اتوجعت صبحت شقيانه
وفيكي قلوب زي الحجر
عايشين يجرحوا ولا بيتجرحوا
ويا عيني ع اللي الزمن جرحوا
لا لاقي حد يداويه
ولا قلب حنين يدفيه
مش بقلك يا دنيا قدرتي
قدرتي بجد تكسرينا

الجمعة، 4 مارس، 2011

علمتني الحياه


علمتني الحياه انها لا تعطي المرء ما يتمناه حتي يتعلم
فالطعنه الاولي تجعلنا اقوي علي مواجهة المصاعب

الأربعاء، 2 مارس، 2011

موسيقى تركية حزينه

مش قلتلك يا قلبي


ادعي يا قلبي
مفيش شئ بأيدك
دا المكتوب لك
هيكون من نصيبك
موعود يا قلبي بالوجع
منين ما تروح يصيبك
كل ما تهرب منه يجيلك
ولا عمرك يوم اتكلمت
مع انك ياما اتألمت
مش قلتلك يا قلبي
مش قلتلك بكره غدار
مش قلتلك سيبها لله
وبلاش في يوم تحتار
دا بكره لحظه بتيجي
بتبدل كل الافكار
ومين يعرف نهاية المشوار
ودي كلها حكم واقدار
يارب يا عالم الاسرار
ارحمني برحمتك وبدل الاحوال

الأحد، 20 فبراير، 2011

الجرح يعلم الكثير


لا تنظر خلفك ابدا ولا تنتظراحدا لا يأتي لك ولا يهتم بأمرك
فمشاعرك غاليه لا تعطيها الا لمن يقدرها لا لمن يبعثرها ويدمرها
لا تندم اذا اعطيت يوما فلا بد ان يأتي من يعطيك فالحياه ليست ان نعطي فقط
فالقلوب تحتاج من يعطيها .
فاجعل من ماضيك القاسي تجربه لحياه قادمه عشت تنتظرها ليالي,
فانتظر ايها القلب الحزين المسكين ولا تبكي .
فسيعوضك الله عن كل عذاب ذقته مادمت تعيش باحساس وضمير حي
فلا تنظر لمن وضعك تحت قدميه وان جمعتكم صدفه بعد سنوات.
حقا رب صدفة خير من ألف ميعاد

هشام الجخ - التأشيرة



الشاعر دا كلامه جميل جدا

الأحد، 13 فبراير، 2011

اه م الهم يابا


يا دنيا امتي تديني
ومن جراحك تداويني
ليه بتاخدي كل شئ
حتي فرحي وضحكة سنيني
ليه خدتي كل حاجه
ومسبتيش اي حاجه
حتي الحلم مستكتراه عليا
ليه قاسيه كدا يا دنيا
نفتح ليكي قلوبنا تصدينا
نبعد عنك تشدي ايدينا
في الحلم تعيشينا وتعشمينا
وفجأه تضربينا
من العذاب تكسرينا
ترمينا....تغربينا
غداره قلابه
حقيره وكدابه
واه م الهم يابا
اه م الهم يابا

الي شهداء ثورة 25 يناير

الخميس، 10 فبراير، 2011

وارجع واقول قدر


في الدنيا كتير محرومين
م العذاب والهم شقيانين
ولامتي هتفضل كدا يا قلبي
لامتي هتبات حزين
عشت مجروح
شايل جواك
هموم الدنيا وعذاب السنين
والدمع بحر مالي العين
يا عذاب واخدنا لفين
ياطريق نهايتك ايه
وعلينا يا دنيا قاسيه ليه
ادينا شوية حنيه
يازمان وحده وحده عليا
مش كدا علي مهلك شويه
وارجع واقول قدر
قدر مكتوب علي الجبين
والدنيا ياما فيها مجروحين
عايشين علي امل مستنيين
لحظة فرح وحنين
ولأمتي هتبات حزين

الأحد، 6 فبراير، 2011

وازاي هحلم تاني


وازاي هحلم تاني

بعد ما تاهت مني احلامي

بعد ما ضاعت كل الاماني

ازاي هحلم تاني

نفسي احلم واعيش

لكن الحلم اوقات بياخدنا

لفوق وينزلنا ع المفيش

نخرج منه بجراح

واّلام كتير متتنسيش

وتصبح قلوبنا ضحية

زمن قاسي مابيداويش

نكتم دموعنا في عيونا

نحبس همومنا في قلوبنا

ندور عالحنان منلاقيش

ازاي هحلم تاني

وغصب عني بتمني

بالامل عايش وبستني

فرحه تطل عليا تجيني

من برد الليل تدفيني

من ظلم الدنيا تخبيني

لكني بلاقي صوت جوايا يصحيني

يقولي في الوهم متعشيش

نفسي احلم وأعيش

الخميس، 3 فبراير، 2011

بحبك يا بلادي


بحبك بحبك بحبك يا مصر

يا أرض الحضاره والخير والنصر

بحبك وأفديكي بروحي

يا أغلي عندي من روحي

بحبك وحبك ساكن ف كياني

بحبك ومقدرش افوتك ولو ثواني

بحبك يا بلدي وبدعيلك

ربي يحفظك ويصونك

يا مصر دايما في دمي

انتي ابويا وانتي امي

وانتي عندي كل همي

حزنك هو حزني

وفرحك هو فرحي

وبدعي وقول من قلبي

ربي يحفظك يا بلدي

الاثنين، 24 يناير، 2011

عمرك ما تمشي علي هوانا


ليه يا دنيا معندانا
عمرك ما بتمشي علي هوانا
بننسي حاجات وبتيجي حاجات
ودايما قلوبنا شقيانه
نقع ونعافر ونعدي
وانتي يا دنيا بتمدي
واحنا السكينه سرقانا
ليه يا دنيا معندانا
نحلم بالحب زي ورود
مالجروح صبحت دبلانه
محتاجه لايد ترويها
وقلب حنين يداويها
وعيون تضمها وتحافظ عليها
بس يا تري هتفضل لامتي
هتفضل لامتي تعبانه
ليه يا دنيا معندانا

الأحد، 23 يناير، 2011

قلب الحيره


جربت مره احلم, خرجت مالحلم بكابوس وعذاب مبينتهيش
وكأني عشت جوا دايره مقفوله في خيالي زي سراب ملوش وجود.
حلمت واتمنيت لكني تعبت وشقيت ,وناديت لكن محدش سمعني
وبكيت لكن ملقتش اللي يمسح دمعتي ويقدرني بالعكس مشفتش
غير كل مهانه وقسوه, ومن كتر الحزن اللي جوايا وحواليا
بقيت بعيش جوا خيالي وبحاول ابني جواه حياه سعيده
زي أمل بعيش عليه .
كل ذنبي اني حلمت طب ازاي هقدر اعيش من غير ما احلم
علي رغم من كل اوجاعي بردو بحلم ببكره يكون اجمل واجمل
مقدرش امنع نفسي اني احلم ,ولو محلمتش طب ازاي تبقي حياه.
ولو حلمت اخاف انكسر اكتر واكتر لكني بقول ليه في يوم
ميكونش الحلم حقيقه
عيش واتعلم أفضل من انك تعيش بقلب ميت.

الاثنين، 17 يناير، 2011

اوعاك يا بكره


اوعاك يا بكره تجرحنا
اوعاك مالاّلم تدبحنا
دا القلب ياما شقي
واستني لحظة ما تيجي وتفرحنا
اوعاك يا بكره توعدنا
بفرح وقلب يسعدنا
نصحي نلاقينا جوا سراب
مليان هموم وشجن وعذاب
اوعاك يا بكره تكسرنا
وبلاش في الدنيا تحيرنا
اوعاك يا بكره تودعنا
وتكتر جروحنا واوجاعنا
لا نلاقي حد يسمعنا
ولا قلب من تاني يرجعنا
اوعاك يا بكره تجرحنا

الأربعاء، 5 يناير، 2011

متقولش ماتت الاحلام


اوعي الجراح تكسرك
اوعي الزمان يغيرك
اقتل عذابك بالأمل
قبل ما يجيي يوم ويدمرك
متسبش قلوب انانيه
تقسي عليك وتحيرك
متسبش نفسك للاوهام
متقولش ماتت الاحلام
قاوم بايمانك واتحدي
ظلم وقسوة الايام
دا القلب اللي ضاع وتاه
وداب من كتر الاحزان
زي المدبوح من الوجع
بيضحك من كتر الاّلام
عافرواستني بكره
حتي لو كان صعب عليك
هتلاقي ربك بيبدلها
هتلاقي الدنيا بين ايديك

الاثنين، 3 يناير، 2011

متي ستري قلوبنا الحقيقه؟؟؟؟؟؟؟؟


لماذا اصبحنا هكذا؟؟؟
سؤال دائما يراودني ولا اجد اجابه له, اشعر بحاله
كبيره من الخوف والالم في هذه الحياه واتساّل دائما
لماذا اصبحنا بلا حب ورحمه ,لماذا اصبحت دنيانا
ليس لها معني حقيقي وهدف يستحق ان نعيش من اجله.
فبدلا من ان نتعلم معني الحب والرحمه والصدق
اصبحنا نتعلم كيف ننتقم ونذبح ونأذي المشاعرونقتل الاحاسيس.
لا وجود للحب في قلوبنا ,نجرح من يعطينا ونعطي من يحرمنا
نسير عكس الاتجاه دائما.
لماذا نفهم الحياه فهما خاطئا وكأن نفوسنا تحول بين قلوبنا
وبين الحقيقه حتي لا نستطيع ان نفهمها ونراها
اصبحنا لا نعرف للتسامح طريق ولا للحب معني .
اشعر وكأني وحيده في دنيا مليئه بالبشر , في دنيا
لم أجد لها معني ولا مذاق خاص ,لم أجد فيها سوي الغدر والجرح
والظلم والقسوة .
ولكن ايماني بربي هو من يرزقني الثبات والصبر
ولثقتي بأن لكل هذه المهازل نهايه
اسعي دائما ان تنال رضا ربك لأنه اذا كان معك
كان كل شئ ملك يديك.
فمتي ستري قلوبنا الحقيقه؟؟؟؟؟؟

احداث كنيسه القديسين بالاسكندريه


اي شرع واي دين يقبل دا
ولا تقتلوا النفس التي حرم الله الا بالحق
حسبي الله ونعم الوكيل