الأحد، 30 مايو، 2010

رد يا بكره



رد يا بكره طمني
فرح قلبي ريحني
قلقان منك وخايف
خايف من تاني تجرحني
والقلب مبقاش حمل جراح
بيتمني يدوق هنا وافراح
ويعوض كل اللي راح
ومن بعد القسوه يرتاح
نفسي الاقي نفسي
ويتحقق اللي في نفسي
نفسي اعيش زي كل الناس
والاقي الحب والدفا والاحساس
نفسي اعيش في بحر حنان
يغسل جوايا كل الاحزان
واعيش بالحب طول الزمان
اعيش بالحب رغم اللي كان
ويملي النور والامل الكون
يارب افرجها من عندك
افرجها يارب الكون

الخميس، 27 مايو، 2010

اصبر يا قلبي


كنت يا قلبي بتتمني
تعيش في الحب وتتهني
كنت يا قلبي جريح محروم
عايش ليالي كتير مظلوم
وانكتبلك عمر تاني
مليان بالشوق والاماني
عمر فيه دفا وحنان
بيطوي ليل الاحزان
بينسي كل اللي كان
بياخدنا لبر الامان
عشت يا قلبي موجوع وصابر
عشت ولسه بتجري وتعافر
ماهو كل من عاش حياته بالحب
هيعيش سنين كتير بالالم
لكنه لما يجيله الفرح
هيفهم وقتها قيمة الجرح
اصبر يا قلبي وادعي
واصبر يا كل قلب اتألم
دا الجرح بيقوي ويعلم
وكل شئ مسيره هيعدي
يــــــــــارب

السبت، 22 مايو، 2010

رومانسيه


في عنيكي حلم جميل
في عنيكي هنا وافراح
في عنيكي حب كبير
بيعوضني كل اللي راح
في عنيكي ضحكة سنيني
وفي قلبك شوقي و حنيني
في عنيكي ضحكة ايامي
في عنيكي كل احلامي
في عنيكي راحه وطيبه
بتمحي القسوه الغريبه
في عنيكي امل بياخدني
لبكره وللحلم الوردي
في عنيكي كل شئ
يا اغلي من اي شئ

الي اغلي ناسي




الف مبروك لاحلي واجمل سمر في حياتي وفي الدنيا كلها
ربنا يسعدك انتي ومحمد ويتمم لكم علي خير ويملي حياتكم بأحلي نعمه بالحب والدفا
ويسعدكم و يـــــــــــارب منفترقش ابدا ونفضل دايما صحاب ومع بعض يا حبيبتي يا احلي قمر
وربنا يسعد اهلي وناسي واحبابي وكل الناس يـــــــــــــارب دايما


الاثنين، 17 مايو، 2010

حب وخوف


مالك يا قلبي حيران
وفي كل ليله سهران
مالك من بكره قلقان
خايف من غدر الزمان
محتاج للود والدفا والامان
مشتاق للحب بعد الحرمان
عاشق قلبي مليان حنان
مجروح خايف تاني من الاحزان
عاشق قلبي مليان اسرار
واه من طول المـــشوار
دا محدش لنصيبه بيختار
عدي الليل عــــــــــدي
عدي وجه من بعده النهار
سبحانك ياعزيز يا جبار
يا عالم الغيب والاسرار
سبحانك يارب

السبت، 15 مايو، 2010

يا حلم في خيالي


يا حلم في خيالي
عشت سنين ادور عليه
يا نجم فوق عالي
وحب كبير اتمنيت الاقيه
ومش عارفه اقول ايه
رد يا قلبي رد عليه
قوله هو الهنا والفرح
والدوا من بعد الجرح
قوله هو النور والدفا
والحنين من بعد الجفا
والعطاء بعد الحرمان
قول يا قلبي قول كمان
ياما شفت كتير احزان
لكني بسجد وبشكر الرحمن
علي اي مر دوقته زمان
علي احلي هديه بعد اللي كان
سبحانك يارب الحق
سبحانك يارب يا رحمن
عمرك ما بتظلم حد
وحكمتك في كل شئ بتبان
ويا كل قلب دوقت الالم افرح
بكره ابواب الفرح ليك هتتفتح
سبحانك يا رب يا رحمن

الأربعاء، 12 مايو، 2010

بفكر وبسأل نفسي


كلنا في حياتنا بنهتم بمظهرنا بأكلنا بشربنا ,وازاي يبقي لنا وضع اجتماعي
مرموق ازاي يبقي عندي زي ده واحسن فاهمين اننا كدا بنعمل لمصلحتنا واننا
كدا هنوصل لكل شئ السعاده ,للمستقبل فاكرين اننا كدا عايشين واحنا في الحقيقه
في كل لحظه بنرخص وفاكرين اننا بنعلي اكتر واكتر واحنا جوانا عمال يتخرب ويتدمر
طب ليه مبنسألش نفسنا فين قلوبنا....؟وياتري محتاجه ايه وعاوزه ايه؟وايه أحوالها
تعبانه ولا مرتاحه؟حيه ولا ميته ؟سألنا نفسنا احنا فعلا من جوانا مبسوطين
ولا احنا ماشين كدا وخلاص مش عارفين احنا عاوزين ايه .
بنحب ونعشق وبعدين نفارق ونجرح والاسم اننا بنحب مسألناش نفسنا فين قلوبنا
اللي هي مصدر الحب ليه بقينا حتي لما نشوف قدامنا الاسي والظلم بنلاقي قلوبنا متحجره
مبتتهزش حتي لو شفنا منظر مؤلم في فيلم او مسلسل ,فين هي قلوبنا وفين احساسنا
تاه في وسط زحمة الشر اللي جوانا مسألناش نفسنا ليه كل مدي قلوبنا بتتملي تعاسه وضيق
جرالنا ايه يا بشر ولا احنا اصلا كدا ولا القوي التانيه اتغلبت علينا قوة الشر
بدعي ربي انه يهدينا ويحمينا من اكبر مصيبه عند كل واحد مننا وهي نفسه
يارب ..يارب..يارب

الأحد، 9 مايو، 2010

عـــــــارفه




عارفه .....
مش عارف ليه متونس بيكى وكأنك من دمى
على راحتى معاكى وكأنك أمى مش عارف ليه

عارفه .....
حاسس إنى لأول مره بشوفك
وإنى بشوفك من أول لحظه في عمرى

حاسس إنى يمامه بتشرب فى كفوفك
وإنك شجره وضله وميه بتجري مش عارف ليه

مش عارف ليه متونس بيكى وكأنك من دمى
على راحتى معاكى وكأنك أمى مش عارف ليه


عارفه .....
فرحه كبيره وصوت مزيكا في قلبى
وكأننا حبيبين إتقابلو بعد فراق

ليه فجأه بقيت مستنى لوحدى
ليه بتكلم وأحكيلك وأشكيلك همى

مش عارف ليه متونس بيكى وكأنك من دمى
على راحتى معاكى وكأنك أمى مش عارف ليه

عارفه .....
وأنا وياكى بحس الدنيا فيها سلام وأمان
وإن العالم مفيهوش ولا نقطة أحزان

إيدك خليها في إيدى أنا طفل كبير
وبحس إن أنا وإنتى لوحدينا والكون بستان

مش عارف ليه متونس بيكى وكأنك من دمى
على راحتى معاكى وكأنك أمى مش عارف ليه

الاثنين، 3 مايو، 2010

هي الدنيا كدا


معقول لسه فيه كدا
لسه فيه قلوب بريئه وطيبه
معقول لسه في الدنيا ناس
بتقدروتحب بكل اخلاص
وعيونها مليانه دفا واحساس
في عيونكم مرسوم فرحي
وبحبكم بيطيب جرحي
في عيونكم ساكن حلمي
وفي قلبكم محفور اسمي
في وجودكم دفا وأمان
بيدفي برد الاحزان
بيعوض كل اللي كان
بينسي قسوة الزمان
ويا كل قلب اتحرمت زمان
لازم هتشوف من الفرح الوان
وهي الدنيا كدا
من قلبي انا بدعيلكم
وفي كل لحظه بناديلكم
وربي يحفظكم ويصونكم
يا اغلي واطيب الناس

maha&mohamed


اول مره احس بالفرحه يوم الخميس اللي فات يوم خطوبتي
سبب فرحتي دي اني اول مره افرح فعلا وسط كل احبابي واهلي وناسي
وشفت كمان فرحتهم بيا في عنيهم وحسيتها اوي ربنا يفرحهم كلهم ويسعدهم
ويبعد عنهم الاحزان ويخلينا دايما لبعض