الثلاثاء، 19 يناير 2010

نهاية وبدايه


نهايه وبدايه

ودمعه وضحكايه

وموال وغنوايه

وليل يعدي وبعده نهار

وقلب بيعزف علي الاوتار

وأحلام مليانة بالاسرار

وكلام كبير وحكاوي وأشعار

وراحة ودفا من بعد المرار

وشمس تهل وقمر يغيب

وفرحة تطل وجراح تطيب

وأماني تتولد واحزان تنهار

وأمل يصحي وماضي يموت

وذكريات أليمة تعدي وتفوت

وحال يتغير لحال

دا ربك كريم ببيبدل الأحوال

وهي الدنيا كده

كلام وسكوت... دفا وبرود

يأس وامل... شروق وغروب

وناس تاخد من غير ما تدي

وناس تدي من غير ما تاخد

ومسير اللي عاش في الظلام

يجيي يوم ويطلع للنور

ويخرج ويعدي بره السور

الله علي النـــــــــــــــــــــور

هناك تعليقان (2):

  1. جميل يامها الله عليكى يسلم لسانك بس تفتكرى فى امل فى الحياه ولا خلاص راحت وراحت علينااااا

    ردحذف
  2. داليا حبيبتي
    طول ما ربنا موجود الامل دايما هيفضل موجود
    لازم نتألم ونتعلم ونقابل ناس ونفارق ناس
    هي الحياه كده
    والدنيا علمتني حاجه ان مبكيش علي حاجه متستحقش
    ولا تسوي حتي دمعه واحده من دموعنا

    تحياتي الغاليه

    ردحذف