افتح قلبك

من ألمك ارسم لونك والعايمه لازم ترسي

انسي خوفك

متخفش من بكره

مين عارف ايه بكره

دي الدنيا قلابه

ومين يعرف ايه فيها هيجري

اوعاك تعيش علي الالم

وتضيع حياتك في العدم

بالاراده تقوي علي جرحك

وتنسي خوفك

وتضحكلك ايامك وتصالحك

وتخرج من دايرة يأسك

متخفش وعيش ايامك

الحياه اهي قدامك

اتمني وبكره هتتحقق احلامك

اتحدي كل الاوجاع

ومتبكيش علي اللي ضاع

دا اللي ضاع زمان وراح

جاي من بعده غنا وافراح

وقلبك اللي يوم انظلم

مسيره يروق ويتهني ويرتاح

قطر الحياه هيفضل ماشي

ماشي.......وواخدنا معاه

احلم وفتح عنيك

احلم وفتح عنيك

حب الدنيا من حواليك

الفرحه قدامك بتناديك

والامل جواك ساكن فيك

وبكره اللي جاي مستنيك

احلم وارسم جنتك

واملاها بفرحك وضحكتك

وامشي طريقك وسكتك

تضحك لك ايامك ودنيتك

احلم وعيش اللحظه

احلم دي الدنيا لحظه

احلم وريح بالك

ومسيرها الايام تحلالك

وتحلو لياليك وتتحقق احلامك

ويفرح قلبك ويتغير حالك

متفكرش يوم في اللي جرالك

احلم ببكره وفوق

طير عند السحب فوق

يصفي لك زمانك ويروق

ويجيي من بعد الليل شروق

دي الدنيا غروب وشروق

ناس وناس

في ناس تحبهم يقدروك تخلص لهم يبقوا مش عارفين يعملوا ايه لجل ما يسعدوك
تودهم يودوك عمرهم ما يعرفوا يجرحوك ولا يفكروا في يوم يرموك,ناس بجد
يستحقوك ولا يوم يفكروا يبيعوك, ناس يستحقواا كل الحب والتضحيه قلوب

متعرفش كدب وخداع قلوب مليانه من الدنيا اوجاع قلوب زي الندي صافيه
بتدي كتير من غير حساب, قلوب مليانه احساس وبراح قلوب فيها حب وسماح
وفي ناس تحبهم يستغلوك تخلص لهم يبقوا مش عارفين يعملوا ايه عشان يدمروك
تقرب منهم يبعدوك نفسهم بأي شكل يجرحوك, وبكل انانيه زي اللعبه يرموك
ناس اقل حاجه تعملها انك تنساهم وتفرح انهم بعدوا عنك وسابوك
ميفكروش في يوم يشتروك, قلوب مليانه كدب وانانيه قلوب متستحقش تفكر فيهم ثانيه
وللاسف كتروا اوي في الدنيا ,حتي احساسك خساره انه يكون ليهم,كل حاجه حلوه بيضيعوها من ايديهم
قدر اللي يقدرك وصون اللي يصونك وانسي اللي يكرهك وابعد عن اللي يخونك

وهكذا هي الحياه نهايات وبدايات.

عيش حياتك

عيش حياتك

بحلم جديد

يملي عيونك

فرحه وعيد

يخلق جواك

امل سعيد

ينور كل لياليك وايامك

يدفن كل همومك واحزانك

يطيب كل جراحك واّلامك

يملي قلبك خير وامان

ينسيك قسوة زمان

يفهمك معني اللي كان

يعلمك معني الاحساس

في زمن انعدم فيه الاحساس

وايه تكون حياة الناس

من غير حب ودفا واخلاص

والاحساس لو يوم انداس

ميعوضوش مال ولا دهب وماس

وربنا يهدي قلوب الناس

وعد ومكتوب

كل شئ بأوان

كل شئ مكتوب

والدنيا ليل ونهار

وكل شئ فيها محسوب

ومهما الشمس تغيب

ربك فرجه قريب

ومهما تزيد الغيوم

بكره هتزول الهموم

دا القلب اللي انهزم يوم

مسيره يكسب بعد ما كان مهزوم

والقلب اللي عاش محروم

هيعيش حياته ويتهني ويطول

والحق اللي مهما غاب

هيرجع له مع الايام

هي كده الدنيا

وهي دي الايام

لو مش هتحلم معايا

لو مش هتحلم معايا

مضطر احلم بنفسي

لكنّى فى الحلم حتى

عمرى ما هأحلم لنفسى