السبت، 27 مارس 2010

رحله جوه قلوب الناس


الموضوع ده شدني اوي اني اكتب فيه واتكلم عن بعض الصفات الموجوده فينا
الصفات اللي منها الكويس ومنها الوحش اولا مش ممكن اي صفه كويسه هتتولد جوانا
من غير نعمة الاحساس الشئ الوحيد اللي منقدرش نشتريه بكنوز الدنيا كلها
ولو اتكلمنا عن بعض الصفات الكويسه هتكون اهم صفه هي الصدق ,انك تكون صادق مع نفسك
قبل اي حد ,انك تكون صادق في افعالك وطبعا الصفه دي اصبحت مش موجوده الا عند نادر مننا
لان الاحساس غاب والضمير مات والحياه كلها بقت كدب وخداع بنتعامل ظاهريا وبس وبنفكر اننا
لو امتلكنا كل شئ في الدنيا هنقدر نشتري كل حاجه حتي السعاده وراحة البال وياخدنا تيار الوهم
لحد ما نغرق ونوصل في الاخر للمفيش وبنخسر كل شئ حتي نفسنا
ومن اغلي واحلي الصفات هي العطاء وحب الخير مفيش اغلي من القلب اللي بيدي دايما
من غير حساب مع ان صاحب القلب ده بيعاني ويتألم كتير لأنه دايما بيدي لناس بتعرف تاخد وبس
من غير ما تدي.التضحيه كنز كبير وليس مجرد صفه نبيله ,انك تضحي براحتك وسعادتك في سبيل ناس بتحبهم
يكونوا هما بالنسبه ليك اغلي من سعادتك وحياتك ,وان سعادتك الحقيقيه انك تحس فرحتهم وتشوف ضحكتهم.
ولما نيجي نتكلم عن الصفات السيئه هتكون اول صفه هي الانـانيه لأن اغلب الناس اللي قابلتهم
في حياتي اكتشفت جواهم الصفه دي .الانـانيه هي تفضيل الذات ,نفس بتحب تاخد وتمتلك كل شئ لدرجة انها
ممكن توصل صاحبها للوحشيه والخداع والقسوه العمياء,ممكن تخليه يدوس علي اي حد ويلعب بيه
لمجرد ارضاء غروره ونفسه المريضه.تخليه بكل بساطه يضيع سعادته واهله واغلي ناسه والناس اللي بيحبوه
لأن القلب الاناني عمره ما يعرف الحب الحقيقي ولا هيكون في يوم ليه عزيز او غالي عليه
وكل صفة سيئه من حقد وغل وخيانه بيكون سببها الانانيه لان الاناني بيعيش طول عمره ياخد وبس
من غير ما يفكر في غيره للحظه
ومن ابشع الصفات السيئه ايضا الغرور والكبر انك بتشوف نفسك عالي المقام
لمجرد انك امتلكت شئ من الدنيا الكدابه,بس دا لأن السراب جوانا وحوالينا
والكدب والخداع والانانيه والغش والخيانه امراض بتجري في دمنا,ولوملكنا كل شئ
هياخدنا الشيطان للكدب والخداع والخيانه لأن هي دي النفس الانسانيه
وربنا يبعدنا عن الدنيا اللي كلها كدب وخداع.

هناك تعليقان (2):

  1. السلام عليكم
    ازيك يامها
    تعرفى ان كلامك ده واصلنى جدا
    وكلامك كله ورا كلمه اسمها ( الانانيه )
    مها خلاص يامها الدنيا خلصت خلصت
    فاهماها دى
    معتش فيه حاجه حلوه
    ولا بشر كويسين يحلوا الحياه
    كل واحد بيدور على نفسه
    واهم شيئ مصلحته
    هو ده البنى ادم الا فى الزمن ده
    تعرفى يامها الوقتى الانسان لو حس ان ممكن حد يكون حمل عليه بيرميه عشان هو مش عايز حمول ليه عشان انانى كل الا يهمه نفسه
    برغم ان الانسان الا بيرميه ده ممكن يكون اكتر حد حبه بصدق ومن كل قلبه
    مها انا لو فضلت اتكلم فى الموضوع ده مش هعمل كومنت واحد لا دانا هحتاج اكتب على مدونتك بوست كبير يخص الموضوع ده
    تحياتى الكبيره

    ردحذف
  2. داليا حبيبي
    اكتبي كل اللي انتي عوزاه يا حبيبتي
    فعلا يا داليا هي الانانيه سبب كل حاجه وحشه
    وسبب اننا وصلنا لكده لانها بترخص البني ادم اوي
    وبتخليه زي الوحش الي معندوش مشاعر
    وقبل ما يقضي علي غيره بيكون قضي علي نفسه
    لان الاناني ميعرفش مشاعر ولا حب يعرف كره وحقد
    واكتر الناس اللي بيكرهم هما اكتر الناس اللي حبوه بجد
    بس دا لانه مــــــريض شايف كل حاجه غلط
    ودا لسبب بسيط ان احساسه وضميره مش موجودين
    الواحد لو قال عن الانانيه هيقول كتير

    تحياتي الغاليه يا حبيبتي

    ردحذف